《緣路山旮旯》是岑珈其繼《非同凡響》之後，再次擔正男主角的電影。但由於製作預算只有200多萬，所以在宣傳方面並沒有太多經費，以至電影剛上映的時候，沒有太多院線支持。「連我自己住咗32年嘅屯門，都冇一間戲院係有場次。」幸好製作團體十分用心，不斷舉辦謝票活動，吸引觀眾入場支持；再加上網友們傾力推廣，情況才開始改善。屯門的地標戲院「巴倫紐」和「嘉禾StagE」在電影上映後的第二周增加了場次，讓作為土生土長屯門人的珈其，終於有機會親身跟一眾「同鄉」（屯門街坊）交流。因為他知道能夠「自己做主角」和「在屯門謝票」兩件事於同一個地點發生絕不容易。
上個月電影的票房好不容易超過了600萬，算是勉強可以回本，但大家對珈其的支持仍然有增無減。珈其感動之外，也很激動，因為看著票房的上升，他終於能夠肯定自己當初入行做演員的決定並沒有錯。而這個契機原來亦與屯門有關，正如他所說：「如果唔係喺良景邨長大，我嘅人生可能會截然不同；呢度真係畀咗好多養份我。」
我鄉下喺良景 屯門已是成個世界
珈其形容良景邨是他的鄉下，但其實他並非良景邨居民。「我住嘅嗰個地方叫新圍苑，但由細到大都係同人講，我住良景嘅。因為屯門人人都知良景喺邊，但就冇人識新圍苑，會問：『係咪嗰啲村屋嚟㗎？！』」良景邨位於屯門西北部，而新圍苑就在良景邨旁邊。這裡原本是客家原居民的村落，叫良田村。良田村旁邊有另一條村叫新圍仔。後來配合新市鎮發展，理民府讓村民遷至屯門新墟一帶後，就開始建興公屋，包括了今天的良景邨、田景邨和建生邨；至於新圍苑便是因新圍仔舊址而得名。新圍苑晚良景邨兩年於1990年落成，亦即是珈其出生那一年。自此他的人生就與屯門和良景密不可分。
「好得意嘅地方就係，我啲阿哥同家姐，係喺安定邨嗰邊出世，直到爸爸媽媽成家人搬去新圍苑，我就出世，嗰度當時剛剛起好，所以基本上我幾大，個屋苑就有幾大。然後不論我讀幼稚園、小學（香港紅卍字會屯門卍慈小學）、中學（新會商會中學），都係喺良景邨之內。所以呢個地方畀我嘅感覺係：『我真係覺得呢度係我屋企』、『我嘅家』。即係有啲人成日問：『你鄉下喺邊？』我會話：『我鄉下喺良景！』去交代呢件事，哈哈哈。」
童年的珈其會往菠蘿山上跑，在良景邨的球場上踢波，「基本上成條邨嘅所有範圍都有玩過，甚至細個拍拖啦，打交啦，畀警察逗啦，所有事情都係嗰度發生。」一直到中學才首次離開這個屋邨，向屯門出發。「會同朋友去下屯門市中心，又會去屯門碼頭燒嘢食，或者係去黃金海岸沙灘游水。其實屯門真係好大，係大到，細個唔識嘅時候，會以為『世界』就係咁。因為我哋可以唔使出去市區，我想玩、我想食、我想買，其實嗰度有齊晒。直到個人大咗，開始讀書喇，先知道原來香港有18區，原來屯門只係新界區其中一忽，旁邊仲有天水圍同元朗。」
拖鞋既是特徵也是青春痕跡
到底「良景人」有沒有一些特點？簡單而言就是「有冇樣睇」？珈其答有，但並非「睇樣」，而是「睇腳」。「幾肯定一樣嘢，我唔知出面嘅人點樣啦，我哋住良景嗰班，由細到大，成班同學仔只會著拖鞋落街！好得意呢，一着鞋，就代表要去遠行。踢波就冇辦法啦，一定要着白飯魚。但除咗踢波、返學之外，任何時候，我都係踢拖落街嘅。」難道新年也是「踢拖」去拜年嗎？不可能吧！「大時大節，我哋一定會跟阿爸出去黃大仙搵我婆婆拜年，然後返到嚟，啲人就會成班約喺屋邨樓下賭錢，就係大年初一嗰一晚，你先會喺街上見到大家着住靚衫靚鞋，去到初二，繼續落樓下賭錢，已經全部係着拖鞋。」
當穿拖鞋變成日常，耗損率自然就會高。但因為小時候大家都窮，所以也特別珍惜這對拖鞋。「唔知你有冇聽過，以前有個牌子叫『SF』嘅膠拖鞋，鞋底係黑色嘅，鞋面係白色，我諗基本上一個月就會換一對。我哋會着到平晒、蝕哂，就算白色嗰塊面目甩咗，都會用火機燒，然後黐番，或者擰兩粒螺絲落去，鑽實佢，叫做整番好。」當時珈其與一眾邨友，加起來大概有20人，晚晚都會落去樓下坐，到商場玩。20個人就有40隻拖鞋，所以一定要在鞋面加上標記，有些男生會將故作有型，將整個白色範圍填黑；有些女生會劃上心型符號，至於珈其，就選擇最簡單的方法：寫名。「講出嚟你會笑㗎喎，以前有個名叫做『龍其仔阿虎』，好MK。」他說這是以前為自己ICQ帳戶起的網名，「亂作」而來。「覺得好似個名長啲會型啲啦，然後又有龍又老虎，好威啦……呢個名去到今時今日，我啲中學同學都會久唔久拎出嚟笑下。」
從反叛街童到初入行拍電影
珈其說自己讀小學的時候是個乖乖仔，「放學之後瀡一陣滑梯就立即返屋企」。但升上中學之後就變得很反叛，「一放學就會去公園玩，或者上朋友屋企打機，然後大家各自返屋企食飯，去到夜晚8點就再落去乒乓波枱度HEA，起碼12點先返屋企。阿媽起初好驚，但因為當時冇手提電話打，唔知個仔係咪失咗蹤，好彩啲酒樓開到10點幾11點，入面有固網電話，我哋成班人就會喺呢個時間，打電話返屋企報平安。」晚晚落街玩，到底玩啲咩？珈其直言：「完全冇！你當個目的就係打發時間，但又唔完全係為咗咁。總之就係覺得，呢個習慣好得意。如果嗰晚冇落去，就會覺得：『死啦，我係咪Miss咗啲咩呢？』、『有冇啲咩趣事發生過呢？』，或者『會唔會有人講你壞話呢？』。同埋我哋有男有女，總係有啲女仔你係會鍾意啦，你又會諗：『今日冇見佢，唔知會唔會被第二個人追咗呢？』，所以晚晚都落去坐，阿媽亦都迫於無奈接受，我諗去到中二三打後，跩到係凌晨三四點先返屋企。阿爸成日都鬧我：『你當呢度係酒店呀？』、『屋企係咪有針呀？』，但有咩原因要咁呢？真係唔知，可能就係細個反叛。」珈其說，與太太剛相識的時候，她都曾這樣陪著自己到街上坐，還足足坐了一年。
良景邨範圍不少，有不少公共空間，隨邨內的小朋友年紀漸大，這些地方入夜後就成為他們的聚腳地，他們各有地盤各有名堂，與珈其相熟的這班叫「波枱」，以新會商會中學旁邊的兩張乒乓波枱為立足地；另一有班後生仔，年紀較「波枱」的大，因為以五人足球場作據點，故名「五人場」。他們各自知道對方的存在，但河水不犯井水，甚少來往。直至2016年2月，良景邨小販與領展管理員發生衝突之後，這班邨民才不分黨派，聯手悍衛小販檔做生意的權利。「成條村嘅人都落去撐，同領展嘅人嘈……當時最激烈，係試過有邨民同啲外判管理員打交，但警察一嚟，就冇啦。因為警察都係幫嗰邊，所以就輸晒囉，嗰陣時都好灰心㗎，但總算見識到良景邨邨民咁團結，從來未試過。」
至於「坐街」這個習慣，珈其說自從遇上麥曦茵之後，就慢慢減少了。「第一次真係見到阿曦，其實係喺屯門碼頭，唔係良景，但同良景又有關係。因為嗰時我哋太跩，有個外展社工負責跟進我哋。呢位社工又認識『五人場』果班人，其中一位就係阿曦個表弟。嗰時阿曦準備拍《烈日當空》，就問佢表弟會唔會可以喺良景搵到啲街童，話想知啲𡃁仔諗乜，最後就搵到我同林耀聲，然後約咗我哋去屯門碼頭傾計。個緣份就係咁嚟。」亦因為這段緣份，當時16歲的珈其首次在大銀幕亮相，更因此勾引起他對演藝事業的興趣，開始主動尋覓試鏡機會，幾年間便曾參演多部香港電台拍攝的劇集，亦在多部電影裡擔任配角。但直至2015年參與了《點五步》的演出後才較為人熟悉；後來珈其在多部VIU TV的電視劇裡，包括《教束》、《地產仔》、《IT狗》等，都能大放異彩，其演技終得到大眾的認同。當中有份參與的綜藝節目《膠戰》，更讓他以「爺爺」的花名深入民心，在拍攝當天，即使戴著口罩，很多邨民還是認得出他，主動上前詢問「爺爺」合照。
回顧演員這條路，珈其說特別想多謝兩個人，第一位當然是導演麥曦茵，另一位就是廖啟智。「智叔的離開對我打擊都唔小，因為佢喺我演藝生命入面好重要。佢係一位十分之好嘅前輩，幫咗我好多。我都有少少覺得自己其實幾似智叔。因為我同佢好似不斷都係做配角，但原來做配角都可以做到好似佢咁好，得到好多人認同。講真，一直以來我都冇真正讀過戲劇，真係一個喺片場大嘅紅褲仔，只能夠一路拍一路學。所以我覺得自己嘅演技唔係真係好好，希望嚟緊有機會可以再進修一下，同埋希望自己可以喺演技上有多啲突破。所以我希望可以有一日能夠好似智叔咁叻，成為一個專業演員。」
誓與家人經歷高低 靜待好事不想移民
在屋邨長大的珈其，成為演員之後，才發現其非常貼地的成長背景，原來間接令他變得不怕失敗，唔怕被人睇唔起，亦會睇唔起自己，所以可以更加堅強地追尋自己的夢想。「可能呢個就係所謂嘅養份。我自細就知道我唔需要扮咩偉人，更加唔會覺得自己係咩上流社會嘅人。正正因為我喺屋邨長大，我唔覺得係一件羞家嘅事，所以當俾人話：你又唔高大又唔靚仔，學咩人做演員吖？我又會覺得：係呀，冇問題呀，你咪講囉；我屋邨大嘅，怕咩你講，我開心咪得囉。可能就係呢樣嘢，令我變得比一般人堅強，抗壓能力好高。」
這也是為什麼在珈其心中，良景邨是如此重要。但這個「鄉下」再重要，也重要不過在這裡生活的人。能讓珈其真心愛上這裡的，說到底，始終是人。「其實對環境不滿，我諗好多人都有。但真心，你問我，點解咁鍾意良景邨呢？就係因為啲人囉。因為我喺呢度長大，我喺呢度認識朋友，呢度有好多我熟悉嘅人，包括隔籬鄰舍，包括我由細玩到大嘅兄弟。我諗係啲人，令我愛上呢個地方！呢個地方亦都係因為人，所以有人情味，所以我先會覺得呢條邨好住、舒服、開心。因為你喺呢度經歷咗太多嘢。」
由良景變成屯門，再由屯門放大至整個香港，珈其始終放不低在這裡一起生活的「家人」。「移民，絕對有諗過。但只限於諗，因為小朋友，都有諗過阿仔長大之後係咪可以畀佢有更加好嘅生活。但諗諗下，我都覺得自己真係好鍾意香港呢個地方，所以覺得冇需要真係移民。我願意同太太同個仔喺香港一齊經歷落去，甚至我有一絲希望，話唔定香港可以變番好呢，甚至愈來愈好，好過以前呢？所以我就冇再諗移民嚕！」
INTERVIEW：游大東、KW、Nico Tang
TEXT：游大東、Nico Tang
VIDEO DIRECTING：KW
CAMERA：Kayan Wong、Joffe Cheung
VIDEO EDITING：Joffe Cheung
PHOTOGRAPHY：Tyler Li
HAIR & MAKEUP：Carmen Chung
FEATURING：林耀聲
SPECIAL THANKS：古sir、王sir@新會商會中學
