人氣影集《大熊餐廳》紅遍全球，完美捕捉餐廳光鮮背後，喧鬧躁動的廚房生態，劇中一句Every Second Counts，道出了爭分奪秒的高壓氣氛。同一句說話放在周殷廷（YT）身上，卻是異曲同工。樂壇五光十色，YT的歌手路卻顛沛流離——出道近十年，超過三億秒的累積，才推出了人生第一張專輯《To Whom It May Concern》，集合出道至今共16首作品。專輯除了讓大家從頭認識他，更紀錄了一個為了理想，勇敢迎擊現實的故事。
黑歷史刻成歷練
一頭長髮、一臉鬍鬚、一身肌肉、一身黑衣，這是周殷廷一貫的造型，予人飽練世故的成熟，更獲封YT大哥之名，與初出道的他卻是判若兩人。YT坦言：「過去嘅自己係有希望，但嗰種希望係天真嘅，而家係經歷咗現實嘅洗禮。」
由15歲立志成為歌手，到25歲成為歌手，他以為實現了夢想，出碟出Show指日可待，卻發現現實與他想像的大相逕庭。原來做歌手，對於唱什麼歌、穿什麼衣服，未必有選擇權，甚至不是自己想做的事情。期間經歷低潮，由揸咪唱歌改執導筒，他不禁質疑自己，是否適合做歌手？或者說，自己只能做個失敗的歌手？
〈晨星〉這首歌，寫於他最低潮的時候。當時沒機會出歌，只能轉戰幕後，與當時仍任幕後的林家謙及潘鵬展合寫；本以為會交由其他人唱，竟輾轉回到他手中，還成為演唱會的主題歌：「呢首歌係同年輕嘅自己對話，想佢原諒我犧牲咁多嘢最後都失敗……我想攞最失意嘅一首歌，擺喺最可以發光嘅舞台上，同人講係可以有希望。呢首歌唔止係歌詞本身，連首歌嘅發生，對我嘅意義都特別重大。」
有說往事不堪回首，但YT敢於擁抱他口中的「黑歷史」，並感激這一切，讓他找到現在最屬於自己的路。
歌手夢碎才是開始
沒想過做歌手這樣難，堅持近十年更難，如今YT如何看待歌手這身份？「我冇咗做歌手個好天真嘅Fantasy，覺得自己係特別啲，要其他人嚟Support我……今日嘅我會覺得，我只係一個好普通嘅人，你係煮嘢食、你係揸車嘅，我係唱歌嘅，大家一樣，而呢種平凡係更適合我。」
能夠走出低潮絕非偶然，正是他自命平凡的心態，令他大膽嘗試不平凡的做法。過去一年，YT做了很多一般歌手不會做的事——他主動跑網台，上不同節目爭取曝光；真名上連登與網民對話；活用社交媒體與歌迷互動；一手包辦歌曲的文案及宣傳計劃等等，殺出一條血路，做到YT無所不在，支持者愈來愈多，當初又怎樣踏出這一步？
「我冇得揀，一係失敗，一係做。我同自己講要滴水穿石，覆每一個人，做每一個Interaction，搵每一個台，當我做盡晒所有嘢都失敗嘅話，我會問心無愧。唔做呢啲嘢，就只係停留喺度，冇去到你想到達嘅地方。當所有答案就喺對岸，你會唔會踏過去？呢個就係一個好大嘅轉捩點，令我去做所有嘢。」
目標在於平靜
現在YT看似穩步上揚，但比起抱更大野心計劃下一步，他卻認為最重要的，是內心的平靜：「我內心平靜，唔係嚟自多咗人識，唔係因為到達我心中嘅目標，而係我可以隨時冇咗呢啲嘢，我都可以接受。聽日可能冇人記得YT，明年冇人搵我唱歌，唔緊要，因為我從來都係乜都冇，所有嘢都係一個Plus。」
旁人或者很難相信，在樂壇這個名利場，竟有人會這樣說，要不故作謙虛，要不妄自菲薄吧？但也正因如此，若真做到不怕失去，反而能夠拋開一切，從容自在，引發更多可能性，要擁有必先懂失去怎接受。
為了理想所以現實
講經本來負面，但YT講經卻正面得深入民心，為失意的人帶來活下去的一點光。YT的故事固然勵志，但YT式勵志，並非一味鼓勵正面，反而是刺破現實——
「個世界從來都係咁，會失望只係你諗得太天真，所以我唔主張減壓，我哋需要嘅係抗壓能力；其二係Purpose，要搵到能夠承受壓力同痛苦嘅原因，可以係家庭或者夢想，透過呢啲原因令你一步步向前，正如尼采所講，He who has a why to live can bear almost any how，有原因，就會明白點行落去。」
在追逐理想的路上，堅持不一定會成功，但每個人有自己的節奏，無論花上多少時間，結果是否如意，YT寄語各位：「你唔試你唔會知，最重要係令自己問心無愧。」
Interview & Text: To Lee