Salty Chick 鹽焗雞 音樂使fuck girl學懂愛

也許與很多樂迷一樣，認識鹽焗雞（Salty Chick）的契機，是她在2021年推出的第一張專輯《Sorry I’m a Fuck Girl》。這位emo fuck girl的音樂時而風流，時而傷悲；一把嬌柔女聲，唱出女性視覺下的情與慾。假如當時有人好奇她為何總是描寫性愛，她大概會以「因為我身體只剩下這些愛」來回答。

三年過去，雞姐在去年底交出《使人生change雞湯》這張三專，脫離舊日的情色框架，誠實面對自己當刻的狀態；除了唱出對成長的感悟、無奈與瀟灑之外，同時也對「愛」這回事投放了更多信任——

「成長嘅過程令我明白，愛情同愛係唔一樣。愛情裡面可以有愛，但愛其實係『相信』同『希望』：信呢個世界會變好，信自己會變好，希望將來會過得好啲。」

鹽焗雞的起點與轉捩點

「我都玩咗好耐音樂，而家去到個位置係，點講好呢，好難形容，所以要用啲歌去形容。你明知可能繼續做（音樂）落去都係差唔多，但係又已經變咗生活嘅一部分，冇得唔繼續做。」

「鹽焗雞」這個身份，始於雞姐六年前在SoundCloud發佈〈我唔要男人只係需要撚〉這首歌。成為鹽焗雞之前，這位女生早在十多歲便習慣以音樂紀錄零碎想法，為的是把實體日記化作母親難以偷看的歌詞與旋律；成為鹽焗雞之後，寫過那些關於性關於愛的故事以後，她坦言這種生活的確是挺好玩，可是不太好受。同時亦開始察覺，原來沉迷性愛，不過是一種逼使自身領悟某些「必須領悟的事」的手段；務求以麻木感官與自我傷害，去加快終結輪迴，殊不知卻因而墮進死循環：「出完第二隻碟之後，都灰咗一排。嗰段時間我開始食抗抑鬱藥，成個人戇戇鳩鳩，寫唔到歌⋯⋯我覺得『鹽焗雞』呢個人係一個好嘅artist，但成為呢個人係唔開心。」

再次懂得與「鹽焗雞」相處，全靠一次live show。那次雞姐看見許多十三、四歲的𡃁妹來聽她的音樂，她們一個人來，卻在演出中找到同樣處境的大家，最後一堆女生柴娃娃笑著離場：「我好似見到以前嘅自己，以前我十三、四歲都係好emo，呢個年紀聽得呢啲歌都唔慌『好人好者』，但嗰陣我冇一個community，或者至少喺香港我冇呢啲歌聽，我覺得好孤獨，會覺得我係咪奇撚怪呢？但原來奇撚怪嘅唔係我哋，係個世界，有呢個世界先會產生到咁樣嘅人。嗰陣（live show）我就開始諗，我啲歌難得有人聽，難得有一個community，咁可能我有呢個義務，去帶啲希望俾大家，所以就寫咗最近隻《使人生change雞湯》。」

雞姐在推出二專時說過「原來原諒自己、放過自己、接受自己，比做自己更需要勇氣」。她回想過往的自己，比較看重如何能夠逃離這種fucked up生活；直到製作三專，才漸漸能夠坦然接受這個混亂卻真實的自己：「原來我係會長大，原來我係可以走出呢個輪迴，咁唔代表我老咗悶咗，而只係一個唔同嘅自己。寫咗咁多歌，我覺得好開心，好似將一啲痛苦，轉為一首好聽嘅歌，而呢啲歌又連結到其他人，咁就已經好好。」

「鹽焗雞」的起點，是〈我唔要男人只係需要撚〉這首歌，時至今日，這首歌亦印證了雞姐對自身看法的轉變：「我經歷過一段時間，覺得第一隻碟真係好難聽⋯⋯以前我聽番〈我唔要男人只係需要撚〉係會尷尬，但呢排就覺得大家一齊唱真係好啦，好開心好感動⋯⋯一個沖緊涼諗嘅idea，原來可以係男女老少嘅共同message，係一件好可貴的事，用錢都買唔到，所以我又重新擁抱番呢件事，覺得好彩嗰陣有做到呢啲音樂，好彩嗰陣真係咩都唔理，照出歌。多謝嗰陣嘅自己。」

愛情是人類的closest distance

話及愛情，雞姐回想起青春期的自己，見一個鍾意一個，每次都覺得可以與眼前男生走到最尾，一生一世。她笑指當時的自己好核突，十足戀愛腦，可是隨即又羨慕起這位為愛大無畏的女生：「而家係好難去鍾意一個人，你會分得清咩係chemistry（互相吸引），咩係compatibility（和睦相處）⋯⋯慢慢會接受原來冇嘢係永恆，enjoy the moment就好啦。」

雞姐坦言，在製作頭兩張專輯時，她基本上不相信「愛」，只願意甚至是只可以相信自己：「點樣理解愛情呢件事呢⋯⋯我覺得係closest distance，係Intimacy（親密關係），而我好怕Intimacy⋯⋯當你好想了解一件事，但你又好怕呢件事，點樣可以用最安全嘅距離去感受？就係扑完就算囉。」

2023年推出的第二張專輯《十個陌生的熟人》，雞姐以她與十個陌生人的相處與性愛關係，繼續去探討寂寞與情慾。把性愛直接成為靈感來源，使她將親密關係由「扑完就算」演化成「寫完首歌就算」，好像每個眼前人、每段經歷，都僅是她的取材對象，僅是她的版稅來源。這使她反思自己對愛與親密關係的恐懼與麻木到底從何而生，換句話說，就是鹽焗雞這個fuck girl形象到底是從何時誕生？

也許是來自童年時期的種種創傷與不知所措，來自青春時期的種種經歷與有口難言；導致雞姐自此墮入輪迴，無法抽身，動彈不能。

使她開始覺察到這種輪迴狀態，使她開始正視與接受自己的，是她最愛，也最為相信的音樂：「咁耐以嚟，我堅持到做音樂，或者堅持到唔好做一個壞人，我諗應該係因為對世界有愛，相信世界會變好，相信人性未必真係咁差⋯⋯我覺得音樂真係好好，你面對緊再差嘅事，你都可以將佢做成一首好歌。如果我哋可以套用呢個技能喺生活，其實係可以好強大咁去面對世界。所有最差嘅事，都有佢靚或者有趣嘅地方，都有可以學到嘅嘢。」

香港是個寂寞之城

「好多人好幸運，一出世就已經喺充滿愛嘅環境，咁佢大概好自然就會識得去愛；如果我哋冇咁好彩，記住唔係你嘅錯，只係你咁啱冇遇過呢件事。但我覺得愛係存在，你可以自己俾自己。」

雞姐身為一個在英國生活的港人，深深覺得香港，甚至整個東亞，都是比較「收收埋埋」。沒有足夠的空間，也沒有足夠的勇氣，去表達真正的自己。

「香港社會，細個邊有人會問你想點，讀書嗰陣都冇人問過你『你係邊個』，好似到我哋讀大學嘅時候，先第一次問呢啲問題。大學係一個好好嘅環境，可以探索好多嘢，但可能四年後你就要返工，更加冇機會問自己係邊個。連自己係邊個都唔知，都唔知可以點做自己。」雞姐補充，外國人的約會文化，習慣先有足夠相處，不斷溝通不斷交流，甚至做畢所有伴侶該做的事，直至雙方都認為真的適合，才會真正確立戀人關係。相反，也許香港人自小較少表達自身，與周邊人的連結亦相對較少，以致大家都急於在愛情裡尋找情感寄託。渴求愛，卻不熟悉愛——

「我覺得愛情係逃避孤獨嘅一個方法，例如拍散拖，或者Tinder識人，不過係想有人陪自己睇戲，搵個人去旅行，做一啲拍拖嘅行為，其實好正常，但以前我會睇唔起呢啲，覺得好多時只係我哋想逃避自己，唔想見到自己，所以先搵個人鍾意。」直至雞姐後來搬至英國生活，才發現這裡的人很願意與人建立連結，對「沉船」這件事亦不會太抗拒，對愛的討論相對較開放，也較自在。

話及到此，雞姐提起前陣子有關「觀塘海濱」的討論。看見這群青少年，她笑言覺得好MK，可是同樣也覺得好型、好正：「MK係正㗎，MK係一個願意做自己嘅表現，唔理人哋點睇。可能都需要有少少MK，人先可以成長，如果你錯過咗唯一可以MK嘅階段，咁當你大個咗，做某啲事嘅時候，可能相對上會重衰。喺嗰個階段做MK事，我覺得幾有趣。」

雞姐補充，MK與情慾、情愛一樣，其實不一定要探索，可是假如你對其有渴望、有幻想，希望能靠近多一點點的話；那你可能需要多一些勇氣，勇於變得更MK一點：「我覺得將sexual同love分開啲，反而可以對love更加認真⋯⋯你要清楚自己幾時係casual，幾時係進入關係，唔好你其實係想要casual，對方係想要認真，但你又糊裡糊塗進入咗關係。大家都講出嚟，反而冇咁浪費時間，可以避免多餘嘅傷害。」