Good Night Gym 良夜共渡之地

富德樓，一個藝文工作者與愛好者都相當熟悉的地方。談起這棟介乎銅鑼灣與灣仔的詩意大樓，自然會聯想起獨立書店、工作室或展覽場地；但其實富德三樓有著一家由藝術家阿彤（何倩彤）創辦的運動空間，內裡除了有健身器材、巴柔道服、沙包、瑜珈磚與菲律賓魔杖，同時也有著一群修身又習武的文化工作者，在這個有貓有書有笑聲的健身室，分享每個夜晚。

以運動穩定糜爛的藝術生活

「Good Night」，除了解作晚安，同時亦解作良夜。這個名字，出自Dylan Thomas的詩《不要溫柔走進那個良夜》（Do Not Go Gentle Into That Good Night），詩人認為人不應輕易接受死亡。正如在面對事物消逝，在面對痛苦時，我們應當憤怒，應當掙扎。作為文藝基地裡的動態一隅，前來上課的學生大多為文化界人士，於晚上才有空聚在一起，共渡良夜：「喺艱難嘅時候，呢個晚上要點樣一齊渡過，係我哋自己決定⋯⋯你改變唔到生老病死，但我覺得做運動係俾到希望同鼓舞你，令到『老病死』嘅形態唔再一樣。佢唔係消除你人生嘅痛苦，而係令你可以用另一個方式去承受。」

由藝術界跨足創辦運動空間，阿彤回想也覺得當時的自己很勇敢：「我諗大家都開始想要啲唔同嘅嘢，以前富德成棟都好文靜，做書店、出版、畫畫嘅studio同藝術空間，就連做劇場、跳舞嘅單位都未試過入嚟搞，但嗰陣呢度都覺得藝術家唔可以成日咁『文弱書生』，我哋要硬淨啲⋯⋯想成為一個強壯啲嘅群體。」阿彤坦言，曾幾何時自己也是個不善運動的人，尤其讀藝術時時日夜顛倒，一頭熱地只管創作，於是身體漸漸變得孱弱，甚至廿幾歲便覺得「係咪就嚟死」，直至因緣巧合下跟著朋友去打泰拳，才迎來很大的轉變——

「你做創作，廿四個鐘嘅時間都係自己定，可以唔需要跟呢個世界嘅日程去生活，所以好多人日夜顛倒得好犀利，飲食又唔定時。但當你要去做運動嘅時候，其實好似有樣嘢去穩定咗你嘅生活，有一個定點嘅錨。你要幾點食嘢、幾點瞓覺，先可以每日打拳。我覺得呢個係令我生活開始有重心、有規律，真係磨練你嘅忍耐力同意志力。」

運動世界裡的一張張白紙

與坊間常見的健身室不同，阿彤作為體育界門外漢，以及一名女性，格外希望建立一處能讓所有人都「舒服做自己」的多元空間——就是不論你本來已是運動能手，還是打算前來作出新嘗試的初哥，在這地都不會感到格格不入、戰戰兢兢：「呢到好多文化人，大家（對運動）都係一張白紙，係真係對某啲嘢抱有好奇心，或者真係想去改變自己先過嚟⋯⋯氣氛係好鼓勵彼此，好友善。」

運動與藝術，一動與一靜，看似風馬牛不相及，阿彤卻認為本質互為相通：「我覺得唔單只係運動同藝術，世界上所有知識都係相通。你喺邊度打開門，行入去，只要你行得夠深，不斷行，遇上唔同嘅分岔路，然後終有一日你會發現所有嘢都係相通。」

創辦Good Night初期，有人建議阿彤應專攻一至兩種運動種類，簡而精，方便管理；但她偏偏選擇提供六種不同課程，除了常見的泰拳、巴西柔術、健身與瑜珈，亦有較特別的巴西戰舞與菲律賓魔杖。課程選擇的背後想法，是因為她偏愛運動之間的「互補」與「流動」：「你玩BJJ（巴西柔術），其實健身同瑜伽都會幫到件事，或者打拳同魔杖，兩者都係立技，其實有啲嘢係相通⋯⋯有時當大家好專注某樣嘢嘅時候，會困咗喺自己嘅世界入面⋯⋯我係想大家可以交流多啲。」

除了同學在一堂又一堂的課堂上，不斷強壯體魄，其實在Good Night任教的教練們，也是不斷在接受挑戰。他們會這樣形容這裡的學生：「呢度啲學生問嘅問題，第二度嘅學生唔會問。」阿彤笑言，有些教練起初不太習慣這種「好奇心」，覺得「做」緊要過「講」，傳授技巧比起了解運動背後的文化、傳統與理念更重要。可是因著學生的各種花式提問，例如是招式名稱的由來是什麼？拼法是什麼？原理是什麼？久而久之，師生間自然會互為影響，取長補短，形成獨特的上課氣氛。

除了課程編排別出心裁，Good Night另外一個特別之處，大概是甫進內便映入眼簾的一座大書櫃——上面放滿運動相關的書藉，供學生自由翻看與借閱。這個可能是全港獨有的「體育讀書會」，其實是出自阿彤的私心；皆因她眼見坊間書店從不看重體育相關書籍，或是只購入「如何練成腹肌」或「一百種拳擊招式」等技巧向的工具書：「我一著迷一樣嘢，就會開始睇書研究⋯⋯運動其實有好多好得意嘅文化史，或者有啲文學作品會去書寫身體上嘅痛楚，我發現原來呢啲資源係冇咩人收集，所以自己就開始儲呢啲書。」

阿彤分享，之所以決定設立「PILLOW BOOK CLUB」借書服務，是期待大家在書中寫下閱後感，寫下在課堂上習得的感悟；使這空間除了課上的直接交手，亦能接住同學們的課後想法，齊齊在這地研習身手與啟發思想。習武繼而修身。

名為幸福的這個關卡

「試過有人第一日嚟上堂，然後嘔、暈、叫白車都有，佢哋會話『死啦我係咪唔適合做運動』，或者問之後點算好。我每次都同佢哋講，你最辛苦嗰關已經過咗，最辛苦一定係第一步
開始嗰陣。就好似你失戀，你一定係第一日喊得最慘，之後只會越嚟越好。」在阿彤眼中，做運動其實似是「受苦」，過程中你會累會流汗會酸痛甚至會大叫，但這種受苦是自願的，是主動的，當大腦因而分泌多巴胺過後，便能感到穩定的愉悅感覺：「運動好似係聞風喪膽、好辛苦，但長遠可以俾你更開心、更幸福嘅感覺。係先苦後甜嘅機制。」

阿彤回想，當年她的教授曾經說過，香港的教育制度裡，藝術與體育，總被視作閒科；但世界卻又決不能失去它們——試問我們如何能夠活在一個沒有音樂、沒有設計、沒有電影的世界？又假如我們全民都不做運動，大家的身體與生活質素又會落到何等田地？這些看似「等閒事」的領域，其實都是使我們更容易靠近幸福的專業。

「喺香港市中心，做到一個講心唔講金嘅空間，係真係好珍貴。」近年香港市道低迷，面對來勢洶洶的結業潮，阿彤坦言有做好隨時一切歸零的心理準備，但她堅定相信，所有真正重要的事物，一定會依舊延續下去。

阿彤提到一條經常有人問起的問題：Good Night作為一個運動與文化混合的空間，會否能促成一些「藝術作品」？例如是短片、畫作或展覽？然而，阿彤卻始終認為，只要來這裡上課的人，能夠健健康康、挺起胸膛，以更自在更自信的樣子步出課室，那麼這些「人」其實經已是Good Night最自豪最美麗的作品：「如果大家好多年之後，諗返原來我係因為喺呢度做運動，所以認識到某位好有趣嘅朋友。咁呢個就係我覺得最珍貴嘅嘢。」