活力四射，電量十足，也許是外界對「夜粥小隊」四位大男孩的印象。正如他們之前推出的小組歌曲〈FING!〉，便完全展現出四位的偶像魅力——型住揈，揈住型，唔好俾佢停。
王智德（Alton）、江𤒹生（AK）、陳瑞輝（Frankie）、楊樂文（Lokman），夜粥小隊的四位同是舞蹈員出身，對舞台與表演的熱情同樣熾熱，於是不約而同地從排舞室揈進造星，再揈入MIRROR。七年過去，來到今年的初夏，夜粥四兄弟齊齊揈上亞博《W.T.F. Live 2025》舞台，與觀眾一同跳進這趟剛中帶柔的感受之旅。
或硬淨或柔軟的某種質地
去年的《MIRROR FEEL THE PASSION CONCERT TOUR 2024》，四位與團隊一同密集走訪世界各地大小舞台，揮灑了27場的汗水與淚水。那次的世巡演出，除了是MIRROR的重大里程碑，更同時提醒著他們——不要忽視所有的可能性。
「我大膽講句，其實我哋十二個都冇諗過自己會有演唱會，更加唔會諗到自己可以去到咁遠嘅地方去唱歌、跳舞俾大家睇。嗰個可能性唔係話『可能』同『唔可能』嘅二元對立，而係所有事情嘅發生機率。」隊長Lokman如是說。
MIRROR成軍接近七年，志趣相投的四位除了練就了一份兄弟情，更在各自專注的演藝範疇上，煉成了一種屬於自身的「質地」。入行至今，性格一向率性熱情的AK，認為自己在處事上的柔韌性日漸增加，不再似從前般單一或橫衝直撞，反倒可以給予自己更多的時間與空間，好好思考，好好選擇，以面對一些未能即時破解的難關。
Lokman則認為在這幾年的不斷嘗試、不斷突破間，其實是成就了一種「硬」：「『硬』有好多種，可以係硬淨，可以係硬頸，可以係硬倔，我覺得我係有種咁嘅質地。」與硬相對，Frankie反倒覺得自己其實自帶一種柔軟感覺：「可能呢幾年會孕育咗一種軟弱嘅感覺俾觀眾，始終造星嗰陣都係因為我嘅眼淚，而產生咗一啲話題。可能係呢個觀感，令到我之後嘅作品，都帶有少少眼淚嘅感覺，又或者係想幫人抒發一啲唔開心嘅感覺出嚟。」Frankie補充，身為一個藝人，其實是需要更多作品，去展示自己的不同面向，所以每位兄弟其實都在密密鍛鍊，為求透過未來的更多作品，顯露更新鮮的一面予觀眾。
至於Alton，他自覺不再像以前般活躍於跳舞圈，但在這數年間，每一次接觸過的舞台、演戲或主持機會，其實都使自己有所成長：「不論係技巧上嘅成長，定係思維上嘅成長，只要你有喜怒哀樂過，其實已經係多咗一啲理念。我覺得呢啲全部都唔係白過。」
日常自在練習
是次演唱會名為「W.T.F.」，意指「want to fing」。夜粥小隊的四位作為跳唱歌手，衝入舞台喪揈實屬平常事，可是假若回歸現實，作為當紅藝人的他們，要在平常街道chill住揈卻絕對不是易事。那麼，他們平時會在哪裏尋到一抹寧靜，覓得幾分自在？
「我會喺旅行嗰陣，俾自己搵返呢個感覺。可能喺一個冇太多人認識自己嘅國家，就會俾自己除低口罩，喺街上面行下，好無聊咁周圍望下，做啲入行之後喺香港做唔到嘅事。可能只係短短幾日旅程，但都可以俾自己落返地。」AK選擇在外地感受自由，而另外三位兄弟，卻選擇在香港這片熟悉之地，實行日常自在練習。
放下口罩上街去，對於藝人來說，大概並不輕鬆；可是Lokman卻分享，最近正嘗試與這種被注視的感覺抗衡：「唔係一定做到，但係練習緊⋯⋯嘗試去接受嗰啲注意力，接受一下鏡頭，慢慢你接受多咗，就可能會有感官疲勞，可能就會冇咁敏感，可能係咁。」他笑言這種練習並不輕鬆，假若當天睡眠充足，便會表現得自在一點；但倘若當天睡眠不足，則可能還是會逃避目光，甚至低著頭行走。
Alton的練習方法與Lokman類近，都是儘量在香港保留多些平凡日常：「我可能會再多一份主動，因為好多時我哋行出街，有人會覺得『我知你係邊個』，或者覺得『你好面善』，與其有呢啲目光，我反而會主動同佢哋打招呼，我嘅招呼可能係表示『係呀，係我，打個招呼呀』⋯⋯我會盡量自己做主動，減去一啲猜疑，我覺得將對方拉近自己，係令自己最舒服。我控返個場（笑）！」
至於Frankie，才剛分享最近有增加乘坐公共交通工具的次數，其他兄弟便嘩聲四起，左一句「咁犀利？」，右一言「例如的士啦（笑）」，他隨即認真補充：「地鐵都有搭多咗⋯⋯以前讀書年代，我通常都係坐公共交通工具嗰陣諗得最多嘢，同埋搵得最多新嘢，因為會一路聽住歌。我都幾enjoy嗰個感覺，所以近嚟都做多咗呢樣嘢，我發覺自己都係比較沉返喺自己世界，冇點理周圍有冇人認得我⋯⋯慢慢開始搵返以前嘅感覺，同自己溝通多咗，我覺得幾舒服。」
不論在舞台還是日常，夜粥小隊都在找尋一個最舒適自在的狀態，而接下來的《W.T.F. Live 2025》，亦盛載著四位想說的故事，想表達的心路歷程，他們期待與觀眾一同享受這趟邊唱邊揈的感受之旅。
